Kubikwa sekuqhamuke umkhuhlane wesihudo emizini ehlala abanengi eHarare, egoqela i Warren park, Kuwadzana leBudiriro esibangelwe ngamanzi asetshenziswa yizakhamizi angahlanzekanga.
Umanisipala ulandule ukuthi impompi zamanzi zikhipha amanzi angcolileyo kodwa wavuma ukukhangelisisa loludaba. Inhlanganiso emela izakhamizi zeHarare i Combined Harare Residents Association ithi umkhuhlane wesihudo lo uhlasele kakhulu abantwana.
Kuyonale iviki eyinye ingcwethi kwezempilakahle ebona ngezamanzi yethule umbiko othi amanzi eHarare angcolile kakhulu okungaba yisizatho sokuqhamuka kwemikhuhlane egoqela isihudo imvukuzane leminye, ebantwini abanengi kulelidolobho.
UBrenda Moyo weStudio 7 ukhulume lesiphathamandla seCombined Harare Residents Association uNkosikazi Beatrice Ngwenya othi inhlanganiso yakhe ikhuthaza uzulu ukusebenzisa amanzi ezibhoraneni ezifakwe ngumanisipala kulokusebenzisa awempompini.
