Ikolitshi le Vits University eSouth Africa limanyene lenhlanganiso ezizimeleyo ze Zimbabwe liqoqe umhlangano ngolweSithathu kulelolizwe owokuhlafuna okuhluphayo ekwenjiweni kwama dayimana emigodini yeMarange eManicaland.
UMnu. Farai Maguwu, isiphathamandla senhlanganiso yeCentre for Research and Development enye yenhlanganiso eziqoqe lumhlangano utshele iStudio 7 ukuthi inengi labantu livumelene ukuthi lokhu kusephulwa ilungelo loluntu ekwenjiweni kwamadayimana la.
Kodwa isiphathamandla se nhlanganiso ebona ngokuthuthukiswa kwamabhizimusi abensundu eye Affirmative Action Group, iAAG, uMnu. Supa Mandiwanzira uthi uphikisane labathi kwephulwa ilungelo loluntu eMarange ngoba kungasiqiniso. Ungezelele wathi umhlangano lo ubujonge ukuchothoza eleZimbabwe kuphela njalo inhlanganiso yakhe ibambe abaqoqi balumhlangano ngamandla ukuthi labo ibanxuse.
Ukuze sihlaziye loludaba, uSithandekile Mhlanga we Studio 7 uqale ngokubuza uMnu. Sam Ncube, owayengumkhokheli we AAG, njalo osengumcebisi kulinhlanganiso ukuthi kungaba liqiniso na ukuthi inhlanganiso ezizimeleyo zincedisana lamazwe aphetsheya ukuchothoza eleZimbabwe.