kudonselana amandla kubandla leZanu PF sekufike kusibanga saphezulu kulandela imbiko ethi kulenkokheli ezicatshangelwa ukuthi zikuxuku elithiwa yiG-40 eziqoqa inkulungwane zabantu ukuthi bayetshengisela bekhonona ngexuku elithiwa likhokhelwa ngumsekeli kamongameli, uMnu. Emmerson Mnangagwa.
Konke lokhu kwenzakala phambilini komhlangano omkhulu wedale lePolitburo ozakwenziwa ngoLwesithathu, eHarare lapho enye inkokheli yeZanu PF efunga igomela ukuthi umphathintambo wezemfundo, uMnu. Jonathan Moyo, uzavinjwa ukuthi engangeni.
Kodwa umphathintambo wezabela uMnu. Savior Kasukuwere utshele iphephandaba le The Herald ukuthi lumbuthano ngowokubonga umongameli Mugabe ukuthi ukhokhele kuhle inhlanganiso yomanyano wamazwe abesnundu eye African Union ngomnyaka ophelileyo.
Abenhlanganiso yabalwa impi yenkululeko, abeZimbabwe National Liberation War Veterans Association, bathi bazamisa umbuthano lo ngoba ungowokusola inkokheli yebandla.
Kodwa unobhala jikelele wenhlanganiso yabalwa impi yenkululeko, uMnu. Victor Matematanda utshele iStudio Seven ukuthi kabaseyikumisa lumbuthano ngoba kabafuni kulwisana labesifazane abayibo ababikwa bezakuba begcwele embuthwaneni lo.
Kubikwa kulamabhasi angafika amatshumi ayisithupha azathwala abantu ukuthi baye embuthwaneni lo.
Ukuhlaziya loludaba sixoxe lengcwethi ecubungula ezombusazwe, uMnu. Dinizulu Macaphulana othi konke lokhu kudonselana kungakuthakazelelwa nguMongameli Mugabe ngoba abafuna isikhundla sakhe bexophana bona bodwa.
UMacaphulana uthi okwenzakalyo yibudlwangudlwangu obukade bungadingakali.
"Ngoba ebukhokhelini nxa ubaba esekhulile uyanikeza amandla akhe enganeni zakhe kumbe kubafowabo ngendlela eyenza ukuthi kungabi lombango.Osekusenzakala lapha ngumbango ngenxa yokuthi uybaba kumbe inkokheli yeZanu PF ayikwenzanga ukuthi amandla kumbe ubukhokheli busala kubani," kutsho uMacaphulana.
Wengezelele esithi okwenziwe nguMongameli Mugabe yibutshapha ngoba kungaphetha kucitheka igazi.
UMacaphulana uthi uMongameli Mugabe engaba esuthiseka ngokwenzakalayo ngoba ababanga isikhundla sakhe bexophana bona bodwa.
"Ngulowana umdala othi bangaxabana benze konke abakwenzayo kodwa inqobo bekhonza mina," kutsho uMacaphulana.
