Ibandla le ZAPU lithi lamukela ngentokozo isinqumo somthethwandaba ophezulu wakoBulawayo esokuthi uMongameli Robert Mugabe abeke ilanga okuzaqhutshwa ngalo ukhetho lokudinga ozamela izigaba ezibalisa iNkayi South, iBulilima East, le Lupane East edale le phalamende.
Izigaba lezi zazimelwe ngoMnumzana Abednico Bhebhe, Norman Mpofu, lo Njabuliso Mguni ngokulandelana kwazo.
Abathathu laba baxotshwa kubandla labo leMDC elikhokhelwa nguMnu. Welshman Ncube ngomnyaka ka 2009, esinye sezizatho kuyikuthi babesebenzelana lecele le MDC elikhokhelwa nguMnu. Morgan Tsvangirai.
Ukuxotshwa kukaBhebhe, loMguni, loMpofu kwakhomba ukuthi abasoze beqhubeke bemele lezizigaba ngakho bakhweza udaba lokuthi kuqhutshwe ukhetho ngokuphangisa kulezizigaba emthethwandaba.
Uhulumende yena uthi kulezigaba ezilitshumi lesitshiyangalombili ezilokhu zingelabameli ngenxa yezizatho ezitshiyeneyo kodwa akulamali yokuqhuba ukhetho.
UMnu. Methuseli Moyo, isikhulumi sebandla le ZAPU utshele uSithandekile Mhlanga weStudio 7 ukuthi kusobala ukuthi ibandla lakhe lizanqoba kuzigaba zontathu ngoba lilosekelo olukhulu.