Emkhosini weInternational Aids Conference osaqhubeka eWashington DC, abesifazana abavela emazweni atshiyeneyo awezwekazi leAfrica agoqela eleZimbabwe baphawule ngokusemthethweni inhlanganiso yePan African Positive Women’s Coalition eyokulwisana lomkhuhlane wengculaza kwabesifazana labasakhulayo.
Evula lumhlangano ngokusemthethweni, umsekeli wenhloko kahulumende uNkosazana Thokozani Khuphe, ongumgcinisihlalo weGlobal Power African Women Network uthe kufanele abesifana belwisane lomkhuhlane wengculaza bengelandaba lokukhangelelwa phansi. UKhuphe unike umzekeliso wokuthi yena walwisana lomkhuhlane we mvukuzane yebele engelandaba lamazwi abuhlungu ayekhulunywa ngabantu.
Ekhuluma emhlanganweni ofanayo, uNkosikazi Tendai Westerhoff uchasise izinqumo zalinhlanganiso, elamalunga amazwe eAfrica angamatshumi amabili lane. Umhlangano lo uthethe umzuzo owodwa wokuhlonipha umuyi uMnu. John Evans Atta Mills ubengumongameli weGhana, obhubhe ngoLweSibili.
Emhlanganweni omkhulu we International AIDS Conference uNkosikazi Chewe Luo, isiphathamandla seUNICEF uthe kufanele kunanzwe kakhulu amalungelo abesifazane abaphila lomkhuhlane wengulaza kanye legcikwane leHIV ngendlela yokuqeda ukuthelelwana lumkhuhlane.
Ekhuluma leStudio 7 eceleni kwalumhlangano, ilunga ledale lephalamende uMnu. Blessing Chebundo, yena ongumgcinisihlalo wekhomithi ye Zimbabwe Parliamentarians Against HIV/AIDS uthe umhlangano lo upha inengi amadlabuzane okulwisana lalumkhuhlane.