Ugatsha lwezokulotshwa kwamagama abazelweyo labafileyo lezokhetho, i Registrar-General’s Office, luphakathi kohlelo lokususa amagama abantu abafayo njengendlela yokulungisisa uluhlu lwabantu abavotayo.
Unobhala jikelele walolugatsha, uMnu. Tobaiwa Mudede utshele intathelizindaba izolo eHarare ukuthi ugatsha lwakhe luqale loluhlelo ngenyanga kaNtulikazi njalo luyimizamo yokulungisisa loluluhlu ngoba luhlala luyimpehla ngesikhathi sokhetho amabandla aphikisayo esithi lusetshenziswa ukuqilibezela. Sixoxe lengcwethi kwezombusazwe, uMnu. Bekithemba Mhlanga othi vele nxa uluhlu lwabavoti lungafakwanga emtshineni wama computer luzahlala ludala inkulumo ngesikhathi sokhetho.