Uhlupho lokuswelakala kwamanzi lubikwa lusabalele edolobheni le Harare ngoba inkampani kagetsi eye ZESA iqhuba imisebenzi yokuthuthukisa isititshi sayo esiseKariba osokubangele ukuthi amandla okumpompa amanzi abephansi.
UMnu. Simbarashe Moyo, umgcinisihlalo we Combined Harare Residents Association utshele iStudio 7 ukuthi kwezinye indawo kuhlala kungelamanzi okwensuku ezimbili kusiya kweziyisikhombisa, ngakho bacabanga ukuqoqa umhlangano ngoLwesihlanu ukuze kuboniswane ngaloludaba.
UKhansila Peter Moyo ka Ward 13 kulelidolobho utshele uSithandekile Mhlanga weStudio 7 ukuthi uhlupho olukhulu olubangela ukuswelakala kwamanzi yikucitshwa mahlayana kukagetsi.
