Ukubotshwa kwamalunga eMDC ekhokhelwa nguMnu Morgan Tsvangirai sokusabalele kwafinyelela indawana ezitshiyeneyo zelizwe.
EMutare ngoMvulo kubotshwe abalitshumi lantantu besetheswa icala lokwenza umhlangano eSakubva bengacelanga imvumo emapholiseni.
Abantu laba bebelokhu bevalelwe ngoLwesibili njalo amapholisa abikwa esalisa izihlobo labangane babo ukuthi babaphathele ukudla.
ENyanga khona kubotshwe abayisitshiyagalolunye ngeSonto njalo balokhu bevalelwe. Umeli weNyanga North uMnu Douglas Mwonzora laye ubotshwe ngoLwesibili ephuma edale lephalamende.
NgoMvulo, amapholisa eMasvingo anikeze amalunga alelibandla edale lephalamende ayisithupha amasamanisi okuthi eze emthethwandaba ngenyanga ezayo ukuzothoniswa ngecala lokuphazamisa umhlangano weZanu PF owawukhokhelwa nguMnu Jabulani Sibanda.
Amalunga la abalisa uMnu Tongai Matutu omela iMasvingo Urban, uHeya Shoko omela iBikita West, uAdmore Marima omela iBikita East, uJani Varandani oweBikita South, uErnest Mudavanhu oweZaka North loSenator weZaka uMnu Misheck Marava.
Umsekeli wesikhulumeli seMDC uNkosazana Thabitha Khumalo usole kakhulu amapholisa ngokuhlukuluza abasekeli bebandla lakhe.
EBeitbridge abatshayeli bemota kaTsvangirai ababili bamiswe phambi komthethwandaba ngoLwesibili besetheswa icala lokutshayela imota elamalayithi asetshenziswa ngamapholisa kuphela ngaphandle komthetho. Imota le ngekaTsvangirai njalo babikwa bebevela kweleSouth Africa ukuyayilungisisa.
Ababili laba babotshwe ngempelaviki bakhululwa ngemva kokuba umthethwandaba uvume ukuba bahlawule imali yesibambiso, i bail. Omunye wamagqwetha abo uMnu Lizwe Jamela utshele uNtungamili Nkomo weStudio 7 ukuba bayasisola kakhulu isehlakalo lesi.
