Iqula likaMongameli Jacob Zuma weleSouth Africa elihlangane lenkokheli yamabandla akuhulumende womanyano eHarare ngoLwesine lithi lizaqoqa ugwalo ngenkulumo zeZanu PF leMDC kunsukwana ezizayo, oluzasiwa enhlanganisweni yeSadc oluveza isimo senkulumo lezi.
Iqula leli libikwa lisole kakhulu uMongameli Robert Mugabe, inhloko kahulumende uMnu Morgan Tsvangirai lomsekeli wakhe uMnu Arthur Mutambara ngokungafezi asebekuvumelene phansi kweGlobal Political Agreement.
Lixwayise abathathu laba ukuthi bahlangane ngokuphangisa bahluze ugwalo abalunikezwe ngabameli bamabandla abo kunkulumo, ngenyanga edluleyo. Icele leMDC elikhokhelwa nguTsvangirai libikwa lisithi selisifuna iSadc ibize umhlangano omkhulu ozahluza ukudonselana okukhona.
Ingcwethi ehlaziya ezombusazwe uMnu Dumisani Nkomo utshele uNtungamili Nkomo weStudio 7 ukuthi amabandla akuhulumende womanyano akhanya engazimiselanga ukulungisisa okuhluphayo phakathi kwawo, ikakhulu ibandla leZanu PF.
