IPolitburo yebandla le ZANU PF isikhethe uMnu. Simon Khaya –Moyo umgcinisihlalo waleli bandla ukuthi ancintise kukhetho lokudinga umlawuli wedale lephalamende, okukhomba ukuthi uzangqikilana loMnu. Lovemore Moyo umgcinisihlalo wecele le MDC elikhokhelwa nguMnu. Morgan Tsvangirai, osanda ukukutshwa kulesisikhundla ngumthethwandaba we Supreme Court.Ilanga lokhetho khona lizabekwa.
Ibandla leZANU PF liphinde lakhetha uNkosikazi Oppah Muchinguri lo Mnu. Rugare Gumbo, ukuthi bagcwalise izikhundla ezatshiywa nguNkosikazi Joyce Mujuru lo Mnu. John Nkomo edale lephalamende leleSenate.
Inkokheli yecele le MDC elikhokhelwa nguMnu. Welshman Ncube lokhu igcizelela ukuthi ibandla leli alisoze liphatheke kulolukhetho.
UGumbo, oyisikhulumi sebandla le ZANU PF ubikwa etshele intathelizindaba ngolweSithathu ukuthi uMnu. Simon-Khaya Moyo, yena owake wamela iBulilimamangwe edale lephalamende njalo wamela isigodlo seZimbabwe kwele South Africa ukhethwe ngoba esifanele lesisikhundla.
UNkosazana Thabitha Khumalo, umsekeli wesikhulumi secele le MDC elikhokhelwa nguMnu. Morgan Tsvangirai uthi ibandla lakhe alethuki ngoba lizanqoba.
Icele leMDC elikhokhelwa nguMnu. Welshman Ncube lithi lilandwe yiziphathamandla ze Zanu PF zifuna ukuthi amalunga alo edale lephalamende avotele ilunga lalo, uMnu. Simon Khaya Moyo ukuthi abe ngusomlomo walelidale. Lelibandla lithi icele leMDC elikhokhelwa nguMnu. Morgan Tsvangirai kalifakanga isicelo sokuncediswa yilelibandla kodwa lilande amalunga alelidale ngudlu.
Ukuze sihlaziye udaba lokhetho lwedale lephalamende uChris Gande uxoxe lengcwethi ecubungula ezombusazwe uMnu. Alois Dzvairo, ongumgcinisihlalo wabatsha kunhlanganiso yeNCA endawonye lesikhulumeli secele leMDC elikhokhelwa nguMnu. Ncube, koBulawayo uMnu. Edwin Ndlovu onguye osungula lingxoxo.
