EleZimbabwe lithi lizamisa abantu okwesikhatshana ukuthenga imota ezivela kweleJapan kusahlolisiswa ukuthi azihlaselwanga yitshefu yemkhathini ebangela umkhuhlane wemvukuzane.
Itshefu le eye radioactive idaleke kubhidlika isititshi esikhulu samandla eNuclear ese Fukushima Nuclear Power Plant eJapan ngengozi yeTsunami nyakenye.
Lokhu kuvezwe ngumphathintambo obona ngemota zokuhambisa uMnu. Nicholas Goche ephendula imbuzo evela kumalunga ekomiti yedale lephalamende ebona ngokuphathelane logatsha lwakhe.
UMnu. Albert Mhlanga ilunga lalelidale utshele iStudio 7 ukuthi kulemota ezedlula amakhulu amane esezithengiwe ezizavunyelwa ukuthi zingene elizweni.
UMhlanga uchasisele iStudio 7 ukuti uGoche ubazise ukuthi uhulumende kaseyikuthathela abantu imota ezathengwa eminyakeni eyisithupha edluleyo, ngoba abantu bengelamali yokuthenga ezintsha loba ezile minyaka ephansi kweyisithupha.