Ingcwethi kwezokulima zithi izulu elisanda kuna elizweni alisoze livuselele zonke izilimo ebesezibunile ngenxa yokuswelakala kwezulu, okukhomba ukuthi isivuno salonyaka sizaba sibi kakhulu.
UMnu. Renson Gasela, ingcwethi kwezokulima njalo eyisiphathamandla secele le MDC elikhokhelwa nguMnu. Arthur Mutambara utshele uSithandekile Mhlanga we Studio 7 ukuthi ukuswelakala kwemvundiso lenhlanyelo kwengezelele ububi besimo lesi.
Kusenjalo, izilimo ebesezibulawa lilanga zibikwa sezivukile eziqintini ezithile zenhla yemaNdebeleni kulandela izulu eliqale ngeviki ephelileyo, kodwa isimo sibikwa sisibi kakhulu ezansi yeMandebeleni lapho leli zulu elithole khona izilimo sezitshe okokuthi sekufana nje lokuthi akuzange kwalinywa.