Kuliviki sixoxa lommeli weBulilima West edale lephalamende, uMnu Moses Mzila Ndlovu, mayelana ngezindimi ezitshiyeneyo ezingaqakathekiswayo nguhulumende elizweni.
Indimi lezi - zona ezingafundiswayo esikolo - zigoqela isiVhenda, Kalanga, Sotho, Nambia, Xhosa lezinye.
IsiTonga yiso sodwa phakathi kwendimi ezingayisizo siNdebele lesiShona esifundiswayo ezikolo zePrimary kusukela kuGrade 1 kuze kuyephutsha kuGrade 7.
UMzila, yena oliKalanga, uthi abakhuluma indimi lezi kumele babambane bakhuthaze uhulumende ngamandla ukuthi zifundiswe.
Lalela ingxoxo yethu loMzila kuhlelo Liphuma Lendaba, Litshone Lendaba.
Nxa kukhona ofuna sikuhlafune kuloluhlelo, thumela i e-mail kukheli ethi studio7@voanews.com.
