Kuliviki sixoxa loMnu Abednico Bhebhe, yena osekhethwe ukuba ngumsekeli kamgcinisihlalo webandla leMDC elikhokhelwa nguMnu Morgan Tsvangirai eMatabeleland North.
Lizakhumbula ukuba uBhebhe ubengumeli weNkayi edale lephalamende njalo engowecele leMDC elikhokhelwa nguMnu Welshman Ncube.
UBhebhe uxotshwe kulelibandla ngomnyaka ka2009 kanye loMnu Njabuliso Mguni loNorman Mpofu besetheswa icala lokusekela iMDC kaTsvangirai.
Lokhu kwabangela ukuba abathathu laba balahlekelwe yizihlalo zabo edale lephalamende.
Ngokungena kungatsha zeMDC kaTsvangirai, kusobala ukuba okulandelayo yikuthi uBhebhe adinge njalo ukumela isigaba sakhe seNkayi edale.
UBhebhe uthe ujabule kakhulu ngokukhethwa kwakhe njalo ukhangelele ukusebenza gadalala labanye bakhe emizameni yokukhipha uMugabe esihlalweni. Lalela ingxoxo yethu loBhebhe kuhlelo Liphuma Lendaba, Litshone Lendaba. Nxa kukhona elifuna sikuhlafune kuloluhlelo, sithumeleni i e-mail kukheli ethi studio7@voanews.com. Lingathumela njalo itext message kunombolo ezithi 001 202 465 0318.
