Umbuqazwe weGukurahundi utshiye uzulu weMaNdebeleni leNkabazwe ethithibele esethuswa yibudlova abubona busenziwa libutho lika Mongameli Robert Mugabe ele5th Brigade.
Abanengi lokhe bebuhlungu ngalindaba njalo bathi bafuna iziphathamandla zeZanu PF ezifana loMugabe, iziphathamandla zakhe zebutho ezifana loPerence Shiri labanye abaphatheka kulelihlazo bajeziswe kabuhlungu.
Lizakhumbula ukuthi, ibandla leZanu PF lasungulelwa emzini kaNkala ngabahlamuki abagoqela yena uNkala abasebexexebuke kubandla elalikhokhelwa ngumuyi uDr Joshua Mqabuko Nkomo eleZapu.
UNkala laye ngomunye owethewsa icala lokuphatheka kudaba lweGukurahundi ngenkulumo zakhe ezazigcwele inzondo yeZapu.
Ngesikhathi sombuqazwe, uNkala uke waba ngumphathintambo wengatsha zikahulumende ezitshiyeneyo, okuyinto emuphe isiqwanga sokuba lilunga leZanu PF elimqoka esigabeni seMatabeleland.
Inengi libona uNkala njengomuntu osandla sibomvu njengoMugabe kudaba lweGukurahundi njalo lithi lifuna abe ngomunye wabajeziswayo lanxa nje elilandula lelicala.
Lalela ingxoxo yethu loMnu Nkala kuhlelo Liphuma Lendaba, Litshone Lendaba.
Nxa kukhona elifuna sikuhlafune kuloluhlelo, lingasithumela incwadi ye e-mail kukheli ethi studio7@voanews.com. Lingathumela njalo itext message kumakhalekhukwini kunombolo ezithi +12024650318.
