amalinks wokungena

Breaking News

Lokhu Zithwaliswe Nzima Izizalwane Zamanye Amazwe kwele South Africa


Izizalwane zeZimbabwe ezedlula inkulungwane ezihlala emznini wePholokwane kwele South Africa zibikwa sezibalekele imizi zayaphephela ezintabeni kulandela ukutshaywa lokuhlukuluzwa yizizalwane zakulelozwe.


Omunye ocatshangelwa ukuthi ubekhokhela ubudlwangudlwangu lobu ngukhansila u Tebogo Mojapilo obotshwe wahlawuliswa imali yesibambiso. Kumaviki amabili asanda dlula esinye isizalwane seZimbabwe, uGodfrey Sibanda ugongodwe ngengodo lamatshe waze wafa.


Lokhu sekubangele ukuthi uhulumende wele South Africa abumbe ikhomidi egoqela amapholisa, inhlanganiso ye Red Cross leyomanyano wamazwe womhlaba eye United Nations Human RIghts Commission ukuthi icubungule imbangela yokutshaywa kwabokuza kulelolizwe.


Kodwa ugwalo olwethule lidale lePan African Parliament Monitoring Project lwethesa uhulumende wele South Africa umlandu okungaqakathekisi udaba lokutshaywa lokubulawa kwabokuza.


Kugwalo olwethulwe izolo olulesihloko esithi Implementing the African Peer Review Mechanism, Views From Civil Society idale leli lithi uhulumende weSouth Africa akafaki imizamo eyeneleyo yokuqeda loludubo.


Inhlanganiso yeSouthern African Women Institute on Immigration Affairs, iSAWIMA, isiqoqe umdlalo wenguqu phakathi kweqembu leZimbabwe iHighlanders le Orlando Pirates elakwele South Africa kuyonale impelaviki emizameni yokuqeda impi yobandlululo labokuza.

XS
SM
MD
LG