Uhlelo lukahulumende lokuhlabisa abantwana amajekiseni okuvikela imikhuhlane eyisikhombisa ehlasela abantwana, lukhanya lwamukelwe kuhle nguzulu elizweni jikelele.
Lalobanje ngolweSibili bekulikhefu le Africa day abogatsha lwezempilakahle babikwa beqhubekele phambili behlaba abantwama amajekiseni okuvikela imikhuhlane, ezigabeni zonke zelizwe.
Isikhulumi senhlanganiso yeUninted Nations Children’s Fund iUNICEF, ephathisana logatsha lwezempilakahle kuloluhlelo, uNkosazana Tsitsi Singizi, utshele lumsakazo ukuthi umsebenzi uqhubeka kuhle sibili ngolweSibili.
IUNICEF ithi uhlelo lolu lukhangelele ukuhlaba abantwana abangaba yizigidi ezinhlanu amajekiseni okuvikela imikhuhlane egoqela indingindi. Kuhlatshiswa abantwana abalenyanga eziyisithupha kusiya kwasebeleminyaka elitshumi lanhlanu. uhlelo lolu oluqalise izolo luphela mhla zimbili ngenyanga ezayo.
UBrenda Moyo weStudio 7 uxhume isakhamuzi seBudiriro eHarare uNkosikazi Mavis Gama othi ubone abantwana behlatshwa namhla eBudiriro 5 shopping center esithi kodwa abantu bebekhanya bebalutshwana.
UBrenda uphinde waxhuma owangumeli wesigaba se Hwange east edale lephalamende uMnumzana Thembinkosi Sbindi othi izinduna labosobhuku zenze umsebenzi omkhulu wokwazisa uzulu ngohlelo lokuhlabisa abantwana amajekiseni.
