Laloba uhlelo lokwamukelwa kwemibono kazulu ekulotshweni kwesisekelo sombuso esitsha,soluzafika emaphethelweni, uzulu kwezinye izigaba kasuthiseki ngokuqhutshwa kwalo, kodwa abaluqhubayo besithi luhamba kuhle.
Uhlelo lolu oluqale ngenyanga kaNhlangula lukhangelelwe ukugqitshwa ngenyanga ezayo.
UBrenda Moyo weStudio7 ukhulume lomsekeli womunye wabagcinisihlalo bekhomidi yephalamende ebona ngokulotshwa kwesisekelo sombuso, uNkosikazi Gladys Gombami Dube othi kuliviki, abathapha imibono kazulu basesigabeni seMatobo.
UBrenda Moyo uphinde waxhuma intathelizindaba ezimeleyo uThemba Sibanda othi esigabeni seleMandebeleni uzulu uhlezi ekhuthana lalabo abamukela imibono ngokusilela kolwazi.
Kunjalo nje, amaqula athapha imbono kazulu ngodaba lwesisekelo lolu athi endaweni zePlumtree ezifana leMadlambudzi, iMangubo, iHingwe lezinye, azakwenza imihlangano yawo ngeviki elizayo.
Izakhamizi zakulezindawo lazo zithi ziwamele ngabomvu lawamaqula, njalo zithi okumqoka ezikufunayo yikuthi ulimi lwesiKalanga lufundiswe ezikolo lunanzwe phansi kwesisekelo sombuso.
Zithi njalo zifuna kube lombuso wezabelo, i Devolution of Power. Ukuze sizwe okunengi ngezifiso zabantu besiKalangeni sixhume uMnu Difa Dube, oyisakhamuzi seJutjume kodwa oseBhilithani okwamanje.
