Umthethwandaba waphezulu eHarare walile ukukhulula ngesibambiso se bail iziphathamandla zecele le MDC elikhokhelwa nguMnu. Morgan Tsvangirai ezetheswa icala lokubulala ipholisa uMnu.Petros Mutedza ngomnyaka odluleyo.
Umahluli uMnu. Chinembiri Bhunu uthi ngolweSithathu kuzahlalwa idale ebhawa ye Glenview lapho okwabhubhela khona umuyi, ukwenzela ukuthi abafakazi bechasise ngokupheleleyo okwenzakalayo.
Ngakwelinye icele amagqwetha amela iziphathamandla zenhlanganiso edinga uzibuse eMatabeleland le Midlands, i Mthwakazi Liberation Front ezetheswa icala lokuzama ukugenqula uhulumende aphikisile ukuthi elinye ipholisa liphe ubufakazi kulelicala ngoba kuvunyelenwe ukuthi kasoze akwenze lokhu.
UMnu. Lucas Nkomo, elinye lamagqwetha la, utshele uSithandekile Mhlanga weStudio 7 ukuthi kusobala ukuthi umthethwandaba usuzama ukuqinisa icala leli ngokungekho emthethweni.