Umlamlankunzi kudaba lweZimbabwe njalo enguMongameli weleSouth Africa uMnu Jacob Zuma uthi lanxa ukudonselana kuqhubeka phakathi kweZanu PF leMDC, ulethemba lokuthi konke okuhluphayo kuhulumende kuzalungisiswa.
UMongameli Zuma wethule amazwi la edale lephalamende lelizwe lakhe ngoLwesithathu. Wengeze wathi uzaqhubeka ngemizamo yakhe yokukhulumisana leZanu PF leMDC ukuze kulungisiswe okuhluphayo phakathi kwamabandla la.
NgoLwesibili khona iqula leEuropean Union leSouth Africa ebelihlangana eBrussel likhuthaze uhulumende womanyano ukuthi akhulumisane agcwalisise isivumelwano seGlobal Political Government.
Kunjalo nje, inhloko kahulumende uMnu Morgan Tsvangirai, obeseMelika uphindele eZimbabwe ngoLwesibili ntambama.
UTsvangirai uhlangane leziphathamandla zikahulumende weMelika bekhuluma ngengqubelaphamili eZimbabwe kanye lodaba lwezijeziso ezafakelwa uMongameli Robert Mugabe leziphathamandla zebandla lakhe leZanu PF.
UMnu Tsvangirai utshele iStudio 7 ukuthi iziphathamandla zikahulumende kaMongameli Barack Obama uqonqosele ukuthi kumele kube lenguquko elohlonzi eZimbabwe ukuze imelika yesule izijeziso.
