Umlamulankunzi kudaba lweZimbabwe uMongameli Jacob Zuma owe South Africa uthi uzaqhubeka ngemizamo yokudinga isisombululo kudaba lweZimbabwe.
Imbiko le iza ngemva kokuba uZuma enikezwe impumela yenkulumo phakathi kweZanu PF leMDC eveza sobala ukuthi amabandla la seyehlulekile ukuvumelana entweni ezitshiyeneyo ezilokhu zihlupha phansi kwesivumelwano seGlobal Political Agreement.
Embikweni awethule ngempelaviki uZuma uthe uzaqhubeka ephatha udaba lweZimbabwe ngengqondo evulekileyo njalo engelahlangothi aluthathayo.
Amazwi kaZuma la akhanya ebejonge ukuphikisa lawo ethulwe nguMnu Julius Malema ngeviki esanda kwedlula awokuthi ibandla leANC lisekela iZanu PF. UMalema, yena ongumkhokheli wogatsha lwabatsha kuANC uphinde wasola kakhulu ibandla leMDC esithi iANC ayisoze yafa yadlelana lebandla leli.
Umcebisi kaZuma, uNkosazana Lindiwe Zulu utshele iStudio 7 ukuthi uMnu Zuma ulakho ukuphatha udaba lweZimbabwe loMongameli weMelika uMnu Barack Obama kuhambo lwakho oluqale ngeSonto eWashington DC.
