amalinks wokungena

Breaking News

Okuhluphayo Akulungisiswe Kungakedluli Inyanga - SADC


Ugatsha lweSadc Troika solulaye amabandla akuhulumende womanyano ukuthi agcwalisise isivumelwano seGlobal Political Agreement kungakedluli inyanga.

Lokhu kuvezwe nguMnu Tendai Biti, unobhala jikelele wecele leMDC elikhokhelwa nguMnu Morgan Tsvangirai emhlanganweni awenze lentathelizindaba eHarare ngoLwesithathu.

Isinqumo lesi siphume emhlanganweni weSadc ohlaziye udaba lweZimbabwe ngempelasonto edluleyo kweleNamibia.

UMnu Biti ukhuthaze umgcinisihlalo weSadc omutsha, uMnu Hifikepunye Pohamba, onguMongameli WeNamibia ukuthi afake ilihlo kudaba lweZimbabwe abone ukuthi izinqumo eziphume emhlanganweni weSadc ziyalandelwa.

Olunye udaba olumqoka obekukhangelelwe ukuthi luhluzwe yiSadc ngolokungalandelwa kwezinqumo zomthethwandaba wayo nguhulumende weZimbabwe.

Kuvunyelwene ukuthi kubunjwe iqula elizahluzisisa ukusebenza kwedale leSadc Tribunal leli, lihlaziye njalo ukuthi izinqumo elazithathayo phezu kweZimbabwe ziqotho na.

Ngalokhu, kunyanga eziyisithupha ezizayo, iSadc Tribunal ayimelanga yamukele amacala amatsha. Kodwa iyenelisa ukuhluza lawo ebevele ephambi kwayo.

Lanxa umabhalane weSadc uMnu Tomaz Salomao ekulandula ukuthi lokhu yikumiswa kancane ukusebenza kweTribunal, ingcwethi kwezemithetho zithi lokhu yikho kanye okwenzakeleyo.

‚Äč
XS
SM
MD
LG