Omantshi, abakhalale umsebenzi kusukela ngoMvulo bedinga ukwengezelelwa iholo abathi liphansi kakhulu, bahlangene lomqhatshi wabo ngoLwesibili, kodwa umbiko abawukhuphe ngemva kwalumhlangano ukhomba ukuthi umhlangano lo awuphumanga lesinqumo esibasuthisayo.
Umhlangano lo usuphelile, kuphume umbiko othi uhulumende uthe yena uzaqhubeka exoxisana labo mantshi ngendlela yokulungisa loludaba.
Omantshi bahola imali ephakathi kwamadollar angamakhulu amabili-$200 langamakhulu amathathu-$300, njalo bafuna yengezelelwe ibe phakathi kwenkulungwane eyodwa lenkulungwane ezintathu, $1000 - $3,300.
UMnu. Lizwe Jamela, igqwetha, utshele uSithandekile Mhlanga weStudio 7 ukuthi lokhu sokusitsho ukuba inengi lezibotshwa lizahlala livalelwe okwesikhathi eside ngenxa yokukhalala umsebenzi kwabo mantshi lokhu.