Uhlelo lokuqoqa imbono kazulu luyaqhubeka ngolweSithathu ngemva kwekhefu lokunanza amaqhawe. Icele le MDC elikhokhelwa nguMnu. Morgan Tsvangirai lithi lisahluza udaba lokuhlukuluzwa kwamalunga alo ekuqhutshweni kwaloluhlelo, okubangele ukuthi lumiswe okwesikhatshana eMasvingo ngempelaviki edluleyo.
NgolweSithathu, amaqembu aqoqa imbono kazulu kuloluhlelo azabe ese Matopo ezigabeni ezigoqela izikolo ze Kafusi, Lubangwe, Sankonjana, Tudi- One, Sun Yetsen, Dry Paddock, kanye lase Gokole.
UMnu. Believe Gaule, esinye seziphathamandla zikahulumende ezibona ngokuqhutshwa kwaloluhlelo utshele uSithandekile Mhlanga we Studio 7 ukuthi amanye amaqembu aqoqa imbono le azabe eseLupane ezigabeni ezigoqela iNdimimbili Primary School, i Galiva Line, iMnyathi Business Centre, i Gomoza, iMakhekhe, kanye leNzaligwa.
USithandekile Mhlanga uphinde waxoxa loMnu. Bekithemba Mhlanga, ingcwethi ecubungula ezombusazwe ukuze sizwe imbono yakhe ngaloludaba.