Amalunga ebandla leMDC elikhokhelwa nguMnu. Morgan Tsvangirai angamatshumi amathathu abengaziwa ukuthi asiwe ngaphi ngamapholisa ngemva kokubotshwa ngoLwesihlanu olwedluleyo, aze abonakala ngoLwesibili enkambeni yeSaucetown koBulawayo. Ibandla leMDC lithi abasekeli laba, abagoqela abantwana abaleminyaka elitshumi lanhlanu, bahlukuluziwe esitokisini. Akukaziwa ukuthi bazasiwa nini emthethwandaba.
Kolunye udaba olufanayo amapholisa abikwa abedinga umqondisi womanyano we Zimbabwe NGO Forum, uMnu. Abel Chikomo eHarare ngoLwesibili. Inhlanganiso le ithi uChikomo uzakuya emapholiseni legqwetha lakhe ngoLwesithathu ayekuzwa ukuthi amapholisa engabe efunani kuye.
Kunjalo nje, ibandla leMDC elikhokhelwa nguMnu. Morgan Tsvangirai lithi inani labasekeli balo asebeqalisile njalo ukubalekela udlakela emzini yabo, lokubotshwa mahlayana elizweni besiyadinga ubuphepheli kwele South Africa seliqansile.
UChris Gande weStudio 7 uxoxe lomgcinisihlalo walelibandla kwele South Africa, uMnu. Austin Moyo othi baqoqa ukutshengisela besola ukubotshwa kwamalunga abo mhla welanga lokunanza uzibuse ngoMabasa.