amalinks wokungena

Breaking News

'Sifuna Inkulumo Zigqitshwe Umnyaka Omutsha Ungakaqalisi'


Abakhokheli bamabandla abumba uhulumende womanyano abathi uMongameli Mugabe, uMnu Arthur Mutambara loMnu Morgan Tsvangirai bathi balokujabula okukhulu ngendlela inkulumo phakathi kwamabandla abo ezihamba ngayo njalo bathi balethemba lokuthi zizagqitshwa inyanga le ingakapheli.

Bekhuluma emhlanganweni abawenze lentathelizindaba eHarare ngolweSithathu, abathathu laba baveze njalo ukuthi balokuthokoza ngendlela uhulumende womanyano asebenza ngayo.

UMnu Tsvangirai yena uthe lanxa elethemba lokuthi konke okulokhu kuhlupha phakathi kweZanu PF leMDC kuzalungisiswa umnyaka omutsha ungakaqalisi, uthe kungehlula lokhu bazabuyela kuSadc, yona engumlamulankunzi kudaba lweZimbabwe.

UMongameli Mugabe yena utshayele ihlombe uhulumende womanyano esithi kamelanga ebhidlike ngoba esithi usebenza kuhle njalo selethe intuthuko enengi elizweni, ikakhulu kwezenotho.

UMutambara ugcizelele amazwi kaTsvangirai loMugabe esithi konke okulokhu kuhlupha kuhulumende kumele kulungisiswe ngokuphangisa. Kodwa abathathu laba kabatshongo ukuthi kungaphi lapho abalokhu bedonselana khona.

Ingcwethi ecubungula ezombusazwe uMnu Mandlenkosi Gatsheni utshele uNtungamili Nkomo weStudio 7 ukuthi abathathu laba bebemele bazise uzulu weZimbabwe ngokugcweleyo ukuthi kuyini okulokhu kuhlupha phakathi kwabo.

Kunjalo nje, umeli weMelika eZimbabwe uMnu Charles Ray usekhuthaze amabandla akuhulumende womanyano ukuthi esebenzelane ndawonye evuselele umnotho welizwe.

Ekhuluma leStudio 7 uMnu Ray uthe eleMelika lizimisele ukuvuselela ubudlelwano balo leZimbabwe ngokugcweleyo, kodwa uthe uhulumende kumele womanyano aqale atshengise ukuthi uzimisele ukuhonipha ilungelo loluntu.

‚Äč
XS
SM
MD
LG