Umkhokheli welinye lamacele eMDC njalo eyinhloko kahulumende uMnu. Morgan Tsvangirai uthi ibandla lakhe lizabe likhona embuthanweni wokunanza ilanga lokuthola uzibuse ele Independence Day, lanxa lingavumelananga ngedikimba yalonyaka lebandla le ZANU PF.
Ibandla le ZANU PF likhethe indikimba yalelilanga ukuthi ibe ngeyokuthuthukiswa kwabensundu, i-Indigenization, kodwa ele MDC belifuna ukuthi indikimba kube yikuthula - PEACE.
Umsekeli wesikhulumi salelibandla uNkosazana Thabitha Khumalo utshele uSithandekile Mhlanga we Studio 7 ukuthi ibandla lakhe lizananza lelilanga ngoba liqakathekile kungakhathalekile ukuthi ibandla le ZANU PF lithini.
Kusenjalo, uMongameli Robert Mugabe ubikwa eqoqele abantwana idili leminyaka yonke ngalelilanga eSports Centre eHarare.
UMnu. Ignatious Chombo, umgcinisihlalo wekhomithi eqoqa ngalelilanga, uthi amalungiselelo wonke awokunanza lelilanga kusasa asefikile emaphethelweni.