UMongameli Jacob Zuma weleSouth Africa uthi sokube lokuvumelana entweni ezitshiyeneyo phakathi kukaMongameli Robert Mugabe, uMnu Morgan Tsvangirai loMnu Arthur Mutambara.
Egqiba uhambo lwakhe ngolweSine ngemva kokuhlangana labathathu laba, uMongameli Zuma utshele intathelizindaba eHarare ukuthi bavumelene ukulungisisa okunye obekuhlupha kuhulumende womanyano.
Uveze njalo ukuthi abamela iZanu PF lamacele womabili eMDC kunkulumo bazaqhubeka bekhulumisana ukuze bathole isisombululo kukho konke okulokhu kuhlupa.
UZuma uthe inkulumo phakathi kweZanu PF leMDC zizaqhubeka mhlaka 25, 26 lomhlaka 29 kulinyanga, esithi mhlaka 31 kuzamele abakhulumisanayo laba bamnikeze ugwalo azaluhambisa kuSadc oluveza ukuthi inkulumo sezikuliphi ibanga.
NgolweSithathu uZuma uhlangane losibalukhulu webhanga elikhulu lelizwe uMnu Gideon Gono, igqwetha elikhulu likahulumende uMnu Johannes Tomana labanye abatshiyeneyo.
Abazi ngokwenzakalayo bathi uZuma uqonqosele uMugabe, uTsvangirai loMutambara ukuthi balungisise konke abakuvumelanayo phansi kwesivumelwano seGlobal Political Agreement.
Egqiba uhambo lwakhe oluqale ngoLwesibili, uZuma utshele intathelizindaba ukuthi ujabule kakhulu ngokuzimisela akubone kunkokheli yamabandla akuhulumende ekulungisiseni konke okuhluphayo.
Lanxa uZuma esithi usuthisekile ngenkulumo azenze labamabandla akuhulumende womanyano, inengi lingabe selilombuzo wokuthi kambe uzulu usengabona na lesisivumelwano sigcwalisiswa, uhulumende eseqhubeka ngemfanelo.
Ukuhlaziya udaba lolu, sixhume ingcwethi ezicubungula ezombusazwe uMnu Zenzo Nkomo loMnu Joshua Mhambi. UMhambi utshele uBrenda Moyo weStudio 7 ukuthi isikhathi sokuthi isivumelwano seGPA sigcwaliswe sesifike, kodwa uNkomo uthi le yinto engasoze yenzakale.
