Isigodlo senkonzo ye Anglican eBhilithane, iLambeth Palace sesikhalaze ukuthi umkhokheli walinkonzo, uArchbishop Rowan Williams yena ophakathi kohambo lokwethekelela amazwe awezwekazi le Africa agoqela eleZimbabwe, Zambia, le Malawi phakathi kwayonale iviki lezayo, ahlangane loMongameli Robert Mugabe.
Lokhu kwenzakala kulengxabangxoza phakathi kwamacele amabili ebandla le Anglican elizweni, elinye likhokelwa nguBishop Nobert Kunonga, ocatshangelwa ukuthi usekelwa libandla le ZANU PF, elinye nguBishop Chad Gandiya osekelwa yisigodlo salelibandla.
UArchbishop Williams ubikwa elobele uMongameli Robert Mugabe incwadi emkhuthaza ukuthi engahlukuluzi amalunga ebandla lakhe, kulandela ukuthathwa kwempahla yalelibandla nguBishop Kunonga, obikwa encediswa ngamapholisa lamasotsha.
Kodwa uBishop Kunonga uyaphika ukuthi uncediswa nguMongameli Mugabe, esithi uphikisana lelinye icele elisekela ukuthi izitabane zikhokhele lelibandla.
Kunjalo-nje, uMfundisi Useni Sibanda, isiphathamandla se Christian Alliance uSithandekile Mhlanga weStudio 7 ukuthi amabandla esiKistu avumelene ukuthi iZimbabwe Council of Churches kube yiyo ezacebisa uWilliams.