Usikomitshi wamapholisa uMnu Augustine Chihuri sexwayise amabandla ezombusazwe ukuba atshiyane lodlakela.
Emazwini awethule kuphephandaba leHerald, uMnu Chihuri uthe abazatholakala bekhuthaza udlakela kumbe bephatheka kulo, bazajeziswa kabuhlungu.
Amazwi akhe alandela inkuthazo efanayo enziwe ngabakhokheli bamabandla akuhulumende womanyano kumaviki edluleyo abathi uMongameli Mugabe, uMnu Morgan Tsvangirai loMnu Welshman Ncube.
UChihuri wengeze wathi amapholisa aphakathi kokulungiselele ukulondoloza ukuthula lapho sokuqhutshwa i-referendum yesisekelo kanye lokhetho.
Abamacele womabili eMDC bathi imbiko kaChihuri iyajabulisa kodwa kabethembi ukubana amapholisa sezaqalisa ukubopha izephulamthetho zeZanu PF.
Isikhulumeli secele leMDC elikhokhelwa nguMnu Welshman Ncube, uMnu Nhlanhla Dube uthe sebezabona ngezenzo ukuba uChihuri uzimisele yini ukubopha zonke izephulamthetho ezigoqela ezeZanu PF.
Amazwi kaDube agcizelelwe nguNkosikazi Thabitha Khumalo, umsekeli wesikhulumeli secele leMDC elikhokhelwa nguMnu Tsvangirai.
Ukuhlaziya amazwi kaChihuri sixhume ingcwethi ecubungula ezombusazwe uMnu Nkululeko Sibanda, ofundisa eHaddersfield University kweleBhilithani yena othe kaboni udlame luphela.
