Usomabhizimusi uMnu Philip Chiyangwa selobele uMongameli Mugabe incwadi emcela ukuthi anikeze inkampani yakhe yeZeco Holdings imvumo yokuthenga ama shares kunkampani kahulumende eye Zisco Steel. UChiyangwa uthumele incwadi le kuMugabe ngoMvulo.
Uphinde wayihambisa njalo kumphathintambo wezama industry uMnu Welshman Ncube, umphathintambo wenhlelo zokuthuthukiswa kwabensundu kwezamabhizimusi uMnu Savior Kasukuwere, umphathintambo wezemigodi uMnu Obert Mpofu labanye.
Encwadini yakhe uChiyangwa uthe kuzakuba liphutha elikhulu nxa uhulumende engavumela amankampani akwamanye amazwe ukuthi athenge ama shares kuZISCO.
Uthi amankampani akwamanye amazwe la alenjongo yokubhidliza umnotho weZimbabwe kanti njalo akufunayo yikuhuquluza kuphela.
Ngalokhu uthi umsebenzi wokukhokhela iZISCO kumele unikezwe inkampani yakhe yeZeco Holdings, yona eyingxenye yenye njalo inkampani yakhe ye Native Investments.
Lanxa uhulumende kunyanga ezedluleyo enxuse amankampani afuna ukuthenga ama shares ku Zisco, uChiyangwa lenkampani yakhe kabazange bazihluphe.
Uhulumende uthi kulamankampani amathathu akwele South Africa, iChina leIndia asawahluzisisa afuna ukuthenga iZisco.
UNtungamili Nkomo weStudio 7 uxhume umphathintambo wezama industry uMnu Welshman Ncube yena othi uChiyangwa wayemele ahambise amaphepha akhe kuhulumende alubana wayefuna ukuthenga ama shares ku Zisco.
