Ekuqhubekeni kokudonselana phakathi kweziphathamandla zebandla leZANU PF ko Bulawayo, uMnu. Isaac Dakamela, omiswe ukubangumgcinishlalo walelibandla ngeNsonto, uhambise emapholiseni udaba ekhonona ngokuthi intsha kanye leziphathamandla zalelibandla ziyamhlukuluza njalo zikhuphe umoya wamathayi emoteni yakhe.
Intsha yalelibandla, ekhokhelwa nguMnu. Butholezwe Gatsi, ibikwa ithathele uMnu. Dakamela imota abeyisebenzisay lamakhiye ehofisini yakhe ngodli isithi kasengumgcinishlalo walelibandla ngoba isikhundla sakhe sesithethwe nguMnu. Killian Sibanda.
Kodwa uMnu. Sikhanyiso Ndlovu, isiphathamandla salelibandla uthi yiPolitburo yalelibandla elakho ukutsho ukuthi uDakamela usemisiwe umsebenzi okwesikhatshana kumbe hatshi, njalo nguye okhuthaze abatsha ukuthi bebuyisele imota kaDakamela lamakhiye akhe ehofisi nxa bengafuni udaba lolu lukhwezwe emapholiseni.
Bobabili uSibanda loDakamela babikwa sebebhalele amahofisi eHarare ngodaba lwabo njalo bemelele impendulo.
UMnu. Dakamela utshele uSithandekile Mhlanga weStudio 7 ukuthi kusobala ukuthi abatsha bathunyiwe yiziphathamandla zalelibandla ezifuna isikhundla sakhe.