Umthetho ophathelane lezamabhizimusi owe Indigenisation and Economic Empowerment Act ubikwa usucutshungulwa kutsha yikomidi yedale le Cabinet, ngoba uqale ukusetshenziswa ngesi phange phange ungakahlolisiswa.
Lokhu kugcizelelwe ngumphathintambo obona ngezokuthengiselana lamanye amazwe, uMnu Welshman Ncube, ekhuluma labanini bamabhizimusi ngolweSine eHarare.
UNkosazana Thabitha Khumalo, umsekeli wesikhulumi secele le MDC elikhokhelwa nguMnu. Morgan Tsvangirai utshele uSithandekile Mhlanga we Studio 7 ukuthi ukucutshungulwa kutsha komthetho lo kuyadingeka ukwenzela ukuthi umnotho welizwe uthuthuke.
Lanxa lumthetho, owe Indigenisation and Economic Empowerment Act wahlaziywa eminyakeni emibili edluleyo kungakabi lohulumende womanyano, icele leMDC elikhokhelwa nguMnu. Morgan Tsvangirai lithi kawumiswe ngoba uzaxotsha abokuza abafuna ukusungula amabhizimisi elizweni.
Uzulu yena utshiyene imbono ngaloludaba abanye bewusekela kanti njalo abanye ngabathi kawususwe.
Ukuhlaziya loludaba uChris Gande weStudio 7 uxoxe lomgcinisihlalo wenhlanganiso ekhuthaza ukuthuthukiswa kwabaninibhizimusi abensundu, esigabeni seMatabeleleland, i AAG, uMnu. Sam Ncube endawonye lengcwethi ecubungula ezombusazwe, uMnu. Bekithemba Mhlanga.
