Inhlanganiso elwela ilungelo loluntu emhlabeni jikelele eyeHuman Rights Watch yethule ugwalo oluveza ukuqhubeka kokuhlukuluzwa kwabantu emigodini yakoChiadzwa eMarange, ngaphambilini komhlangano weKimberly process oqale ngoMvulo kwele Israel.
IHuman Rights Watch imanyene lezinye inhlanganiso zomhlaba ezigoqela iGlobal Witness, World Diamond Council lezinye zikhuthaza ukuthi iKimberly Process inganiki eleZimbabwe imvumo yokuthengisela amazwe omhlaba amadiamonds ako Chiadzwa, ngoba elegazi kumbe engcolile.
NgoMvulo umhlangano weIsrael lo uhle wakhuluma ngodaba lweZimbabwe njalo ukhangelelwe ukwamukela inkuthazo evela kusikhonzi sayo eZimbabwe uMnumzana Abbey Chikane othi eleZimbabwe selenelise ukulandela izinqumo zenhlanganiso le, ngakhoke kumele inikwe imvumo yokuthengisela amazwe omhlaba amadayimana akoChiadzwa.
UBrenda Moyo weStudio 7 uxhume usomabhizimisi wakoBulawayo uMnumzana Michael Bathandi Mpofu othi uhulumende weZimbabwe kumele alungisise udaba lwakoChiadzwa masinyane ukuze uzulu athole intuthuko ezavela ekuthengisweni kwamadayimana la.
