Inhlanganiso yeUnited Nations Development Program ithi ikhathazeke kakhulu ngodlakela olukhona eZimbabwe, isithi lungaqhubeka ilakho ukunganiki ikhomidi eqhuba umsebenzi wokuloba kutsha isisekelo sombuso welizwe, eye Copac imali yokuqedisa umsebenzi lo.
I UNDP ithi uhulumende kumele athembise ukuba umhlangano wesibili we All Stakeholders Conference okhona ekupheleni komnyaka awusoze uphazanyiswe njengalokho okwenzakale kowakuqala owenziwe ngomnyaka odluleyo.
Udlakela lukhanya solusabalala ngamandla elizweni njalo inengi lithi likhathazeke kakhulu ngalokhu.
I UNDP ibikwa ithembise uhulumende imali engangezigidi eziyithoba mimwe mibili yokuqedisa ukulotshwa kwesisekelo sombuso esitsha.
Kodwa ithi udlakela lungaqhubeka ilakho ukungayikhiphi limali.
Imbiko le iza ngesikhathi amabandla akuhulumende womanyano athi iZanu PF lamacele womabili eMDC ekhangelelwe ukuhlangana eHarare ngoLwesihlanu ehlafuna udaba lodlakela.
Omunye wabagcinisihlalo beCopac uMnu Edward Mkhosi utshele iStudio 7 ukuthi iUNDP ingekela ukuphathisa uhulumende ngemali, umsebenzi wokuloba isisekelo sombuso esitsha ungaba sengozini enkulu.
Ukuze sihlaziye udaba lodlakela uSithandekile Mhlanga oweStudio 7 uxoxe loMnu. Qhubani Moyo, isiphathamandla secele le MDC elikhokhelwa nguMnu. Welshman Ncube, njalo elilunga le Joint Monitoring and Implementation Committee endawonye loMnu. Peter Moyo, isiphathamandla secele le MDC elikhokhelwa nguMnu. Morgan Tsvangirai njalo engukhansila we Norton eHarare.
UMnu. Peter Moyo usungule lingxoxo ngokutshela uSithandekile Mhlanga we Studio 7 ukuthi kufanele uzulu azwisise isisusa saloludlakela ngaphambilini komhlanganweni wakusasa okhangelelwe ukuxazulula loludaba..
