Abasekeli beZanu PF bagombolozele inkamba yamapholisa emzini weMbare eHarare ngoMvulo besithi bafuna ukuthi baphiwe uMnu. Costa Machingauta umsekeli kamkhokheli wogatsha lwabatsha kucele leMDC elikhokhelwa nguMnu. Morgan Tsvangirai. UMachingauta ukhululwe ngoMvulo ntambama engetheswanga cala.
Lokhu kwenzakala lanxanje uMongameli Robert Mugabe esole abasekeli bakhe ngempelaSonto emngcwabeni kaMnu. Solomon Mujuru, owayengumholi webutho leZimbabwe, esithi kumele batshiyane lomkhuba wodlakela. UChris Gande oweStudio 7 uxoxe lonobhala jikelele wogatsha lwabasakhulayo kucele leMDC elikhokhelwa nguMnu. Morgan Tsvangirai, uMnu. Promise Mkhwananzi othi amazwi kaMugabe akhanya engalalelwa muntu.