Uhulumende weZimbabwe usola ugatsha lwenhlanganiso yomanyano wamazwe womhlaba olwe United Nations Development Programme-UNDP, elizweni ngokudonsela emuva ekukhupheni izigidi ezintathu zama dola-$3million, yokuthenga imitshina yenhlelo zofuba leminye imitshina esetshenziswa ezindlini zokuhlola abagulayo.
Iphephandaba le The Herald lithi iziphathamandla zogatsha lwezempilakahle zithi zakhalaza kugatsha lolu ukuthi luthenge imitshina ebiza izigidi phose ezintathu-$2,7million , njalo yesabela ukuthi ayizukuyithola ngoba imali le ayisoze isetshenziswe kungedlula inyanga eziyisithupha ezizayo.
I-UNDP yathathela i- National AIDS Council umsebenzi wokwaba imali ye Global Fund ngesizatho sokuthi izaqeda ukungethembeki ekusebenziseni imali eleZimbabwe eliyiphiwa ngumanyano we United Nations.
UDokotela Gibson Mhlanga, umqondisi wohlangothi olubona ngokuvikela imikhuhlane kugatsha lwezempilakahle utshele uSithandekile Mhlanga weStudio 7 ukuthi ugatsha lwakhe luhlangane le UNDP ngoMvulo lwahlafuna loludaba.
