amalinks wokungena

Breaking News

Uhlelo Lokulotshwa Kutsha Kwesisekelo Sombuso Lulokhu Lungakaqalisi Kwezinye Izindawo


Kubangelwa yimbiko yokuqhamuka kodlakela kwezinye izindawo zelizwe

Uhlelo lokuqoqa imbono kazulu ezangena kugwalo lwesisekelo sombuso lubikwa luqhubeka phakathi kodlakela kwezinye izigaba ze Mashonaland. Abasekeli be MDC kanye labalwela ilungelo loluntu babikwa besithi bayahlukuluzwa ngamalunga e ZANU PF, kodwa ibandla leli liyakulandula lokhu. Uhlelo lolu luqalise esigabeni se Matabeleland South, ngaphandle kweMatshetsheni, lapho induna yalesisigaba ebikwa ibisaqoqa okuthile. Ukuze sizwe okunengi ngaloluhlelo, uSithandekile Mhlanga we Studio 7 uxoxe loMnu. Amen Mpofu, umsekeli kaMayor wedolobho lako Bulawayo.

Uzulu wemandebeleni jikelele uthi ufuna ukubona ukususwa kwamandla ombuso kuhulumende oyedwa ohlala eHarare aphiwe izabelo ukuze zizibuse phakathi kwezinto ezinengi afuna ziguqulwe kusisekelo sombuso esesikhangelelwe ukulotshwa kutsha.

Izakhamizi zezinye izabelo zelizwe zibikwa zingathakazeleli inyathelo lamapholisa lokuthi engagqoki impahla zomsebenzi lapho okuthathwa khona imbono kazulu ezasetshenziswa ukuloba kutsha isisekelo sombuso. Lokhu kwenzakala kulembiko ethi kwezinye indawo akula ngitsho lepholisa elilodwa. Osanda khethwa ukuba ngomunye wabaphathintambo bezamapholisa, uNkosikazi Theresa Makone utshele iStudio 7 ukuthi udubo lokusilela kwezimota yilo olubangela ukuthi amapholisa engafinyeleli izigaba zonke zelizwe. Umgcinisihlalo wenhlanganiso eyabalwa impi yenkululeko, iZimbabwe Liberators Platform, Peace Initiative, uMnu. Max Mkandla utshele iStudio 7 ukuthi uzulu ukhanya engalothakazeleli loluhlelo ngoba engafundiswanga ukuthi kuyini okumumethe isisekelo sombuso welizwe.

XS
SM
MD
LG