Indubeko ezihlasele uhlelo lokulotshwa kwesisekelo sombuso esitsha zikhangelelwe ukuhlafunwa emhlanganweni ozakwenziwa ngolweSibili eHarare yinkokheli yama bandla amathathu abumba uhulumende womanyano, bendawonye labagcinisihlalo abaqhuba umsebenzi lo edaleni lephalamende iParliamentary Select Committee.
Umhlangano lo uzakhokhelwa ngumphathintambo obona ngokulotshwa kwesisekelo uMnumzana Eric Matinenga.
Ngemva komhlangano wangolweSibili kukhangelelwe ukuthi kuzacaca ukuthi abakhangelelwe ukuyathatha imibono kazulu sebezaphuma nini besiya ezigabeni zelizwe.
Kuzakuthike ngolweSithathu abagcinisihlalo beParliamentary Select Committee bazakuba lowabo umhlangano sebeqoqa ukuthi kuqhutshekelwe phambili njani ngohlelo lolu.
Udaba lokusilela kwemali yilo olukhanya solubuyisele muva lumsebenzi, kodwa inhlanganiso ye United Nations Development Programme- UNDP lezinye eze European Union zithi zizaphathisa uhlelo lolu ngemali.
UMnumzana Edward Mkhosi omunye wabagcinisihlalo be parliamentary select committee, uthi bakhangelele ukuthi umhlangano wakusasa uzahlaziya kabanzi udaba lwemali.
