Inengi labantu lithi ukusilela kwemali emabhanga obekuhlasele amadolobho amakhulu kumalanga ambalwa edluleyo sokunganeno njalo indwendwe ezinde ebezisemabhanga azisabonakali.
Lanxa iStudio 7 ingasatholanga ithuba lokukhuluma leziphathamanlda zikahulumende ukuze sizwe ukuthi uhlupho lokuswelakala kwemali luqedwe kuyini, abantu makhaza abakhulume le Studio 7 bathi indwendwe sezimfitshane emabhanga e Harare lako Bulawayo.
Kodwa zibikwa zilokhu zibonakala emabhanga afana leBeverley Building Society leCABS, okuvele kuyimvama ngesikhathi kulungiselelwa ikhefu leKhisimusi.
Kumalanga ambalwa edluleyo, usibalukhulu webhanga elikhulu uMnu Gedion Gono wethese umlandu ugatsha lwe Treasury wokunganikezi iReserve Bank of Zimbabwe imali eneleyo ukuze liyinikeze amabhanga.
Isiphathamandla seCombined Harare Residents Association, uNkosazana Beatrice Ngwenya, utshele uSithandekile Mhlanga we Studio 7 ukuthi lanxa uhlupho lwemali solunganeno, inengi labantu kalenelisi ukuthenga elikufunayo ngoba lihola imali encinyane.