Inhloko kahulumende uMnu Morgan Tsvangirai sekhuthaze amabandla akuhulumende ukuthi asebenzelane ndawonye emizameni yokuthola indlela iZimbabwe engazisebenzisa ukwesula izikwelede elazo enhlanganisweni ezifana leIMF, iWorld Bank le African Development Bank.
UMnu Tsvangirai wethule amazwi la emhlanganweni oqhutshelwe eHarare ngoLwesine ngenjongo yokuhlaziya udaba lwesikwelede seZimbabwe sona esisedlula amabhiliyoni amahlanu amadola eMelika.
Umhlangano lo ubizwe ngomunye wabasekeli bakaTsvangirai kuhulumende uMnu Arthur Mutambara yena okhokhela ikomidi enikezwe umlandu wokudinga indlela ilizwe engazilandela ukwesula kumbe ukuhlawula izikwelede zayo.
Umphathintambo wezemali uMnu Tendai Biti uthe iZimbabwe kumele ingene kuhlelo lwamazwe alobuyanga kunhlanganiso ye IMF olwe Highly Indebted Poor Countries ukuze ixolelwe ukuhlawula izikwelede zayo.
Kodwa umbono lo uphikiswe ngabanye, ikakhulu abeZanu PF abathi ilizwe kumele lithengise inotho yalo efana ledayimana ukuze ithole imali yokuhlawula izikwelede lezi.
Umhlangano lo uhlaziye njalo udaba lwezijeziso. Abaphatheke kuwo bagoqela iziphathamandla zeWorld Bank, ADB, iziphathamandla zikahulumende labosomabhizimusi, kuchasise umphathintambo obona ngokwenzakala ewofisini kaTsvangirai uMnu Gorden Moyo.
