EleZimbawe selikhuthazwe ukuthi linanze uhulumende obunjwe ngabahlamuki kweleLibya ngemva kokugenqula uMnu Moammar Ghadafi embusweni.
Inkuthazo le iza ngemva kokuba umanyano weAfrican Union uveze kuliviki ukuthi usuzasebenzelana lenkokheli yaluhulumende.
Uhulumende weZimbabwe uxotshe ummeli weLibya eHarare ekuqaleni kwalinyanga emveni kokuba ephume mgceke ukuba usekela abahlamuki.
Abogatsha olubona ngobudlelwani beZimbabwe lamanye amazwe baveze ngaleso sikhathi ukuthi iZimbabwe izabuye idlelane njalo leLibya nxa iNational Transitional Council sinanzwe yiAfrican Union.
Isikhulumeli sikahulumende uMnu Webster Shamu walile ukuveza ukuba iZimbabwe sizananza yini uhulumende weLibya.
Kodwa abamacele eMDC labeZanu PF bathi lokhu yikho uhulumende amele akwenze.
