Umphathintambo wezemali njalo engunobhala jikelele wecele leMDC elikhokhelwa nguMnu Morgan Tsvangirai, uMnu Tendai Biti uthi uhulumende womanyano ulakho ukubhidlika nxa injongo ayibunjelwayo ingasafezwanga njalo lokuhluphayo kuGlobal Political Agreement kungasalungisiswanga.
Ekhuluma lentathelizindaba eNational Press Club eWashington DC ngoLwesibili, uBiti ukhuthaze umlamulankunzi kudaba lweZimbabwe uMongameli Jacob Zuma weSouth Africa ukuthi angenele ngoba inkulumo phakathi kweZanu PF leMDC sezehlule.
UMnu Biti uthe uhulumende womanyano ulakho ukubhidlika nxa okuhluphayo kusivumelwano seGlobal Political Agreement kungalungisiswanga njalo lezinto ezimqoka ezifana lokulotshwa kwesisekelo sombuso esitsha kungasafezwanga.
Ekhuluma ngodaba lokuthuthikiswa komnotho welizwe uBiti ucele amazwe omhlaba ukuthi aphathise eleZimbabwe ngemali engangamabillion athoba minwe mbili amadollar eMelika (US$8 billion).
Ucele njalo amazwe athuthukileyo ukuthi aphathise uhulumende ukuhlawula isikwelede sakhe samabillion ayisithupha (US$6 billion) kunhlanganiso ezifana leWorld Bank, i IMF, iParis Club leAfrican Development Bank. Wengeze wathi isikwelede lesi kumele sesulwe ngoba iZimbabwe ingelayo imali yoku sihlawula.
Ebuzwa yiStudio 7 ukuthi ibandla lakhe limi ngaphi kudaba lwezijeziso ezethulelwa iziphathamandla zeZanu PF ngamazwe afana leMelika kanye le European Union, uBiti walile ukuphendula. Uphinde wasola kakhulu ukuthunjwa kwamapulazi abalimi abamhlophe esithi uhlelo lolu kumele lumiswe abalimi abathathelwa amapulazi abo bahlawulwe.
Uthe amazwe athuthukileyo kumele ancedise eleZimbabwe kulokhu njalo ephathise ilizwe lithuthuke. Lanxa kulengxaki ezinengi ezixaka uhulumende womanyano, uBiti uthe ubona ikusasasa yeZimbabwe imi kakuhle.