amalinks wokungena

Breaking News

Uhulumende Ulakho Ukumisa Inhlelo Zikazulu Ngenxa Yokungatholi Imali Evela Kwezenjiwayo:Biti


Uhulumende uthi lokhe esehluleka ukuthola imali eyenziwa ngamankampani emba amadayimani eMarange okuzakwenza ukuthi kungaqhutshwa inhlelo zikazulu ngemfanelo njalo kungasabhadalwa iholo lezisebenzi.

Umnu. Tendai Biti umphathintambo wezemali utshele intathelizindaba ngoLwesine eHarare ukuthi ukuswelakala kwemali yamadayimana kanye lesivuno samabele esiphansi salonyaka kuzakwenza ukuthi umnotho welizwe ungasathuthuki ngesilinganisi phose esilitshumi ekhulwini – 9.4% esikade sikhangelelwe lonyaka.

UBiti uthe amankampani awemba amadayimana anike uhulumende izigidi ezingamatshumi amathathu zamadollar eMelika – $30.5 million kuphela ekuqaliseni komnyaka kulokuthi kutholakale izigidi ezilikhulu lamatshumi amabili amadollar - $123 million.

Uhulumende wenelise ukubuthanisa imithelo efike kuzigidi ezingamakhulu ayisikhombisa lamatshumi ayisikhombisa amadollar eMelika - $771 million kusungulwa umnyaka ka 2012. Bekukhangelelwe ukuthi kutholakale imali yemithelo efika kuzigidi ezingamakhulu ayisitshiyangalombili lamatshumi ayisikhombisa amadollar eMelika - $870 ngalesosikhathi.

Uthe okumangalisayo yikuthi uhulumende kenelisi ukuthola imali yokwemba amadayimana kunkampani ye Angin Investments enkulu kulazo zonke eMarange.

Umnu. Masimba Kuchera ingcwethi kwezenotho uthi nxa amankampani emba amadayimana eMarange engaqhubeka engahambisi imali kuhulumende kuyenzakala ukuthi kumiswe inhlelo zikazulu njalo lohulumende angenelisi ukubhadala iholo lezisebenzi.

XS
SM
MD
LG