Uhulumende uthi kusukela kusasa sokuzaba logwalo lokuhambisa okwesikhatshana olutsha olwe Temporary Travel Document, olusebenza okwenyanga eziyisithupha, oluzathatha indawo lwe Emergency Travel Document, obe lusebenza okwamaviki amathathu kuphela.
Umphathintambo obona ngokwenzakala elizweni uMnu. Giles Mutsekwa utshele iStudio 7 ukuthi inyathelo leli lilandele ukuxokozela okube emngceleni we South Africa ngoMpandula odluleyo, ele South Africa lisithi incwadi ezindala aziqondanga ngoba zengezelelwe amalanga ngesidindo kuphela yiziphathamandla ze Zimbabwe. Incwadi ezintsha zibikwa zizabe zibalwa ngumtshina ngakho akulamuntu ongazibazela efanayo ngokungekho emthethweni.
USithandekile Mhlanga we Studio 7 uxoxe lengcwethi ecubungula ezokungena lokuphuma kwabantu emazweni atshiyeneyo, uMnu. Mlamuli Nkomo yena othi eleZimbabwe lisebenzisa kakhulu incwadi lezi ngoba abantu bengenelisi ukubhadalela amapassports, wona abiza amadollar eMelika edlula alikhulu- $140 00. Incwadi ezintsha zona zibiza phose amadollar angamatshumi amane- $38. 00.