EleZimbabwe lilakho ukubuyela kusimo elike laba kuso ngomnyaka ka2008 nxa uMongameli Mugabe lenkokheli yebutho bengaqhubeka besala ukuthi isivumelwano seGlobal Political Agreement sigcwalisiswe njalo uhulumende abuse ngendlela ehlonipha intando kazulu.
Lokhu kuvezwe yinhlanganiso ehlaziya ezombusazwe emhlabeni wonke jikelele eye International Crisis Group (ICG) embikweni ewethule ngoLwesithathu lapho ekhuthaze khona eleSouth Africa ukuthi lingenele ngamandla kudaba lweZimbabwe libandezele ibandla leZanu PF leleMDC ukuthi eqede ukudonselana lokungezwani okukhona phakathi kwawo.
Inhlanganiso le ithi njalo abenhlanganiso ezizimeleyo abapha uncedo kumele labo bancedise uhulumende womanyano emizameni yakhe yokuvuselela ilizwe, isithi lanxa nje uhulumende lo exega, kukhona okuhle asekwenzile okufana lokuthuthukisa umnotho lokuqeda udlakela elizweni.
Kodwa ithi uhulumende ulakho ukuba sengozini enkulu nxa abebutho bengekelwa besenza intando yabo besala lokulandela izivumelwano ezikhona. Yengeze yathi abebutho laba balakho njalo ukuhluthuna intambo zombuso kungenziwa ukhetho iZanu PF inqotshwe.
Ukuhlaziya udaba lolu uNtungamili Nkomo weStudio 7 uxhume ingcwethi ecubungula ezombusazwe uMnu Qhubani Moyo yena othi kavumelani lakancane lembiko yenhlanganiso le.
