Abalwela amalungelo abantu abaphila legcikwane lengculaza bathi bawemukela ngezandla zombili umbiko kahulumende owokuthi lonyaka uzakwenza imizamo yonke esemandleni akhe ukuthi abantwana bonke abaphila legcikwane le HIV bethole amaphilisi ama ARV's awokulwisana lalumkhuhlane.
Kulabantwana abazinkulungwane ezingamatshumi amabili-20 000 ababikwa bethola ama ARV's kuhulumende, kodwa abanye abazinkulungwane ezingamatshumi amahlanu-50 000 lokhu bewaswela, ngoba engeneli, kukanti abanye bayehluleka ukufinyelela kundawo zokwelatshwa ngenxa yomanga omude.
UMnumzana Sipho Mahlangu isiphathamandla somanyano wenhlanganiso zabaphila legcikwane lengculaza owe Zimbabwe Network of People Living with HIV and AIDS (ZNNP+)utshele uSithandekile Mhlanga we Studio 7 ukuthi inhlanganiso yakhe izakhuthaza uhulumende ukuthi akhuthale kuloluhlelo ngoba udaba lwabantwana abaphila legcikwane lengculaza belungananzwa kakhulu elizweni.