Abalimi abamhlophe badlela evalweni kulandela imbiko kamsekeli kamongameli, uMnu. Emmerson Mnagagwa othi uhulumende usezaqinisa uhlelo lokuthatha amapulazi njalo kwabamhlophe abaseleyo kunye labensundu abalamupulazi amanengi, abalamakhulu aqunywe.
UMnangagwa wethule lamazwi embuthanweni wokuvalelisa abasekeli bakhe njengelunga ledale lephalamdene esigabeni se Chirumanzu-Zibaggwe kulandela ukukhethwa kwakhe ukuba ngumsekeli kamongameli.
UMnangagwa ubikwa ethe ukuthathwa kwamapulazi lokhu kuzamele kwenziwe ngesiqubu ukwenzela ukuthi udaba lomhlabathi luphutshe.
Lokhu kwenzakala ngesikhathi kuqhamuke imbiko ethi kulabanye abensundu abasetshenziswa ngebulungu ukuthatha amapulazi aphinda abiselwe ebalungwini ngudlu.
Njengesibonelo, iphephandaba le The Sunday Mail lithi owayeqoqa inhlelo zeZanu PF, uMnu. Didymus Mutasa wayelamapulazi alitshumi lanhlanu awabela izihlobo, abangane labanye.
Kodwa ingcwethi ecubungula ezombusazwe njalo elilunga lebandla leZanu PF, uMnu. Morris Ngwenya uthi udaba lomhlabathi luzaqhubeka lusiyaphambili ngoba inani labafuna ukulima liya liqansa.
