Isithombe sika muyi uMnumzana Joshua Nkomo esembulwe ngolweSithathu edolobheni lakoBulawayo sizakwethulwa sisuswe ngoba imuli yako Nkomo lezakhamuzi zakoBulawayo bekhonone ngokubekwa, langesimo sesithombe lesi.
Imuli yako Nkomo ithi ayizange yaziswe ngohlelo lukahulumende lolu, njalo ithi isithombe lesi sincane kakhulu njalo asifani lomuyi uJoshua Nkomo. Kulokucabangela njalo ukuthi isithombe lesi sibazwe elizweni le North Korea lapho okwafundiswa khona ibutho le 5 brigade elabulala abantu besigaba seMatebeleland leMidlands ngesikhathi seGukurahundi.
IStudio 7 yehlulekile ukukhuluma lemuli yako Nkomo ngaloludaba. UBrenda Moyo weStudio 7 ukhulume loMnumzana Dumisani Nkomo owenhlanganiso yeHabbakuk Trust othi kuyajabulisa ukuthi uhulumende uvumile ukulalela izikhalazo zabantu wathi uzakwethula isithombe lesi.
Kunjalo nje uBrenda Moyo uphinde wakhuluma loMayor wedolobho lako Bulawayo uMnumzana Thaba Moyo othi umanisipala wakoBulawayo uzalondoloza indawo le nxa kuzaphanyekwa esinye isithombe sikaNkomo kwelizayo.
Kusenjalo, uSithandekile Mhlanga we Studio 7 uxoxe loMnu. Effie Dlela Ncube, umqondisi wenhlanganiso ye Matabeleland Empowerment Services, endawonye loMnu. Mlamuli Nkomo, ingcwethi ecubungula ezombusazwe ngodaba lwesithombe sika muyi Dr. Joshua Nkomo ngaloludaba. UNkomo usungule lingxoxo.
