Uhulumende weleSouth Africa uthi kasoze axotshe umeli weZimbabwe uMnu Phelekezela Mphoko lanxa sethole incwadi evela kuMnu Morgan Tsvangirai emazisa ukuthi uMphoko wakhethwa nguMongameli Mugabe ngaphandle komthetho.
UTsvangirai ulobele amazwe atshiyeneyo agoqela iSouth Africa, Italy, Sweden leSwitzerland ngeviki edluleyo ewazisa ukuthi abameli beZimbabwe abakulawa mazwe bathunyelwe nguMugabe ngokungekho emthethweni.
Uphinde walobela njalo iUnited Nations le European Union ngokufanayo.
I UN yona yazise ngoLwesihlanu ukuthi kayisoze ithathe manyathelo ngoba umeli weZimbabwe kuyo ekhethwe ngemfanelo. Lo ngumbiko ogcizelelwe ngomunye wabacebisi bakaMongameli Jacob Zuma wele South Africa uNkosazana Lindiwe Zulu.
UNkosazana Zulu, olilunga lequla likaZuma ebeliseZimbabwe ngeviki edluleyo ukuyabhula umlilo phakathi kweZanu PF leMDC uthi uZuma uphatheke ngodaba lweZimbabwe njalo uzakwazisa kusikhatshana esilandelayo ukuthi manyathelo bani azawathatha.
